2020 оны УИХ-ын ээлжит сонгуульд нийслэлийн Баянгол дүүргийн 26 дугаар тойрогт Монгол Ардын Намаас нэр дэвшигчид өчигдөр 7, 16 дугаар хорооны иргэд сонгогчидтойгоо уулзалт хийлээ. Уулзалтын үеэр нэр дэвшигч Ж.Ганбаатар, Д.Лүндээжанцан, Х.Ганхуяг нар Баянгол дүүрэгтээ хийж хэрэгжүүлсэн ажлууд болон улс эх орон, дүүргийнхээ хөгжлийн төлөө цаашдаа юу хийх, МАН-ын мөрийн хөтөлбөр зэргээ иргэд сонгогчиддоо танилцуулж, цаг үеийн асуудлаар ч ярилцлаа.
Нэр дэвшигч Ж.Ганбаатар У.Хүрэлсүхийн Засгийн газрын хийж хэрэгжүүлж байгаа үйл хэргийг үргэлжлүүлж, төрийн албаны хариуцлагын тогтолцоог сайжруулах, иргэдийн татварыг мөнгийг зөв зарцуулж, Баянголчууд болон иргэдийнхээ ая тухтай амьдралыг хангахын төлөө цаашид ч ажиллана хэмээлээ. Нэр дэвшигч Д.Лүндээжанцан цар тахлын үед улсынхаа эдийн засаг, нийгмийн амьдралыг сайжруулахын тулд Засгийн газрын хийж хэрэгжүүлсэн ажлуудыг тайлбарлаж, хүүхдийн 20 мянган төгрөгийг 100 мянган төгрөг болгож нэмэгдүүлсэн, ажилтнаа халаагүй аж ахуйн нэгжүүдэд 200 мянган төгрөгийн дэмжлэг үзүүлж байгаа болон нийгмийн даатгалын шимтгэл чөлөөлөлтийн талаарх цаг үеийн сэдвүүдээр иргэд сонгогчидтойгоо ярилцлаа. Нэр дэвшигч Х.Ганхуяг нь УИХ-д өрсөлдөх залуу үеийн төлөөлөл болохынхоо хувьд залуусын хүртэж байгаа боловсролын чанарын асуудлыг хөндөж ярилцсанд иргэд, сонгогчид талархалтай хандаж байсан юм.
Тиймээс Баянгол дүүргийн 7, 16 дугаар хорооны иргэдийн төлөөлөл МАН-аас нэр дэвшигч Ж.Ганбаатар, Д.Лүндээжанцан, Х.Ганхуяг нарыг багаар нь дэмжих болсон учир шалтгаанаа ч өөр өөрийнхөөрөө тайлбарлаж байлаа. Иргэд, сонгогчид шударга, бүтээлч багийг дэмжихээ ийнхүү илэрхийллээ.
Баянгол дүүргийн 7 дугаар хорооны иргэн Ц.Мөнх-Эрдэнэ:
-2016 онд Баянголчууд Монгол Ардын Намыг багаар нь дэмжсэн. Дөрвөн жилийн хугацаанд өмнөх сонгуульд нэр дэвшиж УИХ-д суусан гишүүдийнхээ хийж бүтээж байгаа үйлсийг нь харахад итгээд үзье гэсэн бодолтой байгаа. Багаар нь дэмжиж байна. Залуучуудад амралт чөлөөт цагаа зөв боловсон өнгөрүүлэхэд чиглэгдсэн ажлууд хийдэг бүтээлч баг хэрэгтэй. Хэлсэн амлалтандаа хүрээд ихийг бүтээгээсэй гэж багаар нь дэмжицгээе.
Баянгол дүүргийн 7 дугаар хорооны иргэн Ж.Цэрэннадмид:
-УИХ-ын сонгуульд МАН-аас нэр дэвшиж байгаа багийн хувьд бараг УИХ анх үүсэхээс эхлээд тасралтгүй ажиллаж байгаа Д.Лүндээжанцан гишүүн, дөрвөн жил УИХ-д ажилласан туршлагатай Ж.Ганбаатар гишүүн, эрч хүчтэй бизнес бүтээн босголтын ажлын туршлагатай Х.Ганхуяг нар байна. Тийм учраас эдгээр нэр дэвшигчийг бусад Баянголчуудынхаа адил сэтгэл дүүрэн дэмжиж байна. Нэр дэвшигч нарыг хамгийн гол нь шударга ёс, болж бүтэхгүй байгаа бүхнийг бушуухан цэвэрлэж арилгаж, ард түмний сайн сайхны төлөө ажиллана гэдэг итгэж байгаа.
Баянгол дүүргийн 7 дугаар хорооны иргэн Ц.Цолмон:
-Би Монгол Улсын Ерөнхий сайд, МАН-ын дарга У.Хүрэлсүхийг дэмждэг. Манай Баянгол дүүргийн 7 дугаар хороонд уулзалт хийж байгаа гурван нэр дэвшигчийг нь ч дэмжиж байгаа. Яагаад гэвэл У.Хүрэлсүх сайд өнгөрсөн жилүүдэд маш их ажил хийсэн. Тиймээс энэ ажлуудаа багаараа үргэлжлүүлээд хийгээсэй гэсэндээ дэмжиж байна.
Баянгол дүүргийн 16 дугаар хорооны иргэн Ү.Бямбаа:
-Энэ УИХ-ын сонгуулиар Монгол Улс, Монголын иргэд ирэх дөрвөн жилд яаж амьдрах уу, ямархуу байх вэ гэдгээ шийдэх гэж байна. Манай Баянгол дүүрэгт Данзангийн Лүндээжанцан, Жамбалын Ганбаатар, Хассуурийн Ганхуяг нар УИХ-ын гишүүн болохоор нэр дэвшиж байна. УИХ-д ороод сайн ажиллаж байсан гишүүд, шинэ залуу нэр дэвшигч нар Монгол Улсын хөгжил, монгол хүний амьдралыг дээш татахад өөр өөрийн гэсэн тодорхой хувь нэмэр оруулна гэдэгт би баттай итгэлээ. Тийм учраас энэ гурван нэр дэвшигчээ би дэмжиж байна. Мөн өөрийнхөө үерхдэг нөхдүүд, уулзсан хүмүүстэйгээ ярилцахад энэ гурван нэр дэвшигчийг дэмжинэ гэж байгаа. Яагаад гэвэл өнгөрсөн хугацаанд Засгийн газрын хийсэн ажил үргэлжлэх ёстой.
Баянгол дүүргийн 16 дугаар хорооны иргэн Э.Отгончимэг:
-Би 24 настай залуу хүн. Миний амьдралд ямар нэг дэмжлэг болохоор зүйлийг ярьж байна уу гэдгийг судлахаар энэ уулзалтад ирсэн. Хэн ард иргэдээ бодож, хэн бодохгүй байна вэ гэдгийг өөрийнхөө зүгээс гэр бүлийнхээ зүгээс төлөөлж яриаг нь сонсоод байхад хувь хүн болон хийж бүтээсэн ажлууд нь иргэдэд хэрэгтэй юм байна гэж ойлголоо. Яриаг нь нэг нэгэнгүй сонслоо. Амьдралд хийсэн зүйлүүд нь надад хэрэгтэй байсан зүйлсүүд мөн учраас дэмжиж байгаа. Залуучууддаа хандаж хэлэхэд бид өөрсдөө улстөрчдийг судлаад сайн хүмүүсээ дэмжье.
Баянгол дүүргийн 16 дугаар хорооны иргэн Г.Алтанчимэг:
-МАН-аас нэр дэвшиж байгаа гишүүдийнхээ уулзалтад ирж оролцож байгаадаа баяртай байна. Энэ өвөл бид сайхан утаагүй өвөлжлөө, шинэ төрлийн коронавирус гадуур гудманд тархаагүйд, хүүхэд бүрд 100 мянган төгрөгийн тэтгэмж олгож байгаад эх хүний хувьд маш их баяртай байна. У.Хүрэлсүхийн Засгийн газар Монгол Улсыг 100 хувь авч явж чадна гэдгийг мэдэрсэн учраас багаар нь дэмжье.
Эх сурвалж: УИХ-ын сонгуульд 26-р тойрог Баянгол дүүрэгт
Монгол Ардын Намаас нэр дэвшчигчдийн сонгуулийн штаб
