УИХ-ын нэгдсэн чуулган өнөөдөр 10.30 цагаас эхэллээ. Хэлэлцэх асуудлын жагсаалтыг танилцуулсны дараа УИХ-ын гишүүн Г.Тэмүүлэн горимын санал гаргалаа. Тэрбээр “Оюу толгой”-н гэрээтэй холбоотой УИХ-ын ажлын хэсгийн дүгнэлтийг яаралтай сонсох, мэдээлэл авахыг хүссэн юм.Учир нь өчигдөр “Рио Тинто” компанийн зүгээс гэрээтэй холбоотой ямар ч хэлэлцээ хийхгүй гэсэн мэдэгдэл гаргаад байхад УИХ-ын гишүүд ямар ч мэдээлэлгүй байгааг онцоллоо.
УИХ-ын гишүүн Г.Тэмүүлэн “Рио Тинто компаниас яагаад ийм мэдэгдэл хийсэн, яагаад ноцтой хүлээж авч байгааг ойлгохгүй байна. Бидэнд хоёр талын мэдээлэл хэрэгтэй байна. Гэрээтэй холбоотой асуудлыг
УИХ-ын дарга Г.Занданшатар та энэ асуудлыг хамгийн сайн мэдэж байгаа байх, та УИХ-ын дарга болохоосоо өмнө хоёр жилийн хугацаанд энэ асуудлыг хариуцаж байсан шүү дээ. Ажлын хэсгийн дүгнэлтийг яаралтай хэлэлцүүлэх хэрэгтэй байна” гэсэн юм.
Харин УИХ-ын дарга ирэх долоо хоногт ажлын хэсгийн дүгнэлтийг байнгын хороогоор хэлэлцэх болно гэдгийг хэлээд илүү тайлбарыг Эдийн засгийн байнгын хорооны дарга Д.Дамба-Очирыг өг гэлээ.
УИХ-ын гишүүн, ЭЗБХ-ны дарга Д.Дамба-Очир “Оюу толгойтой холбоотой ажлын хэсгийн дүгнэлтийг өнгөрсөн долоо хоногт, аудитын дүгнэлт өчигдөр, АТГ-ын шалгалтын дүгнэлтийг мөн өчигдөр хүлээн авсан. Зарим материал өчигдөрхөн ирж байгаа учраас бэлтгэл ажлыг хангаж, ирэх долоо хоногоос хэлэлцүүлээд явна. Оюу толгой, Рио Тинтогоос УИХ-ын даргатай уулзъя гэсэн. Харин УИХ-ын дарга намайг уулз гэсэн. Ингээд гүний уурхайн ажил цаашид үргэлжилнэ, хөрөнгө оруулалт, Дубайн гэрээнд сайжруулах өөрчлөлт орох байх гэтэл эмзэг хүлээн авсан. Гэрээнд нэг ч цэг таслал, үг өгүүлбэр оруулахгүй гэж байна лээ. Харилцаа, ойлголцлын асуудал гэдгийг хатуу хэлсэн. Үүнд эмзэглэж мэдэгдэл хийсэн гэж ойлгож байна. Засгийн газар Рио Тинто, Оюу толгойтой ширээний ард суух байх. Гэрээнд засах зүйлс байгаа, гэтэл эмзэглээд мэдэгдэл хийж байна. Оюутолгойг зогсоохгүйн тулд, хөрөнгө оруулагчид харж байгаа учраас бид болгоомжилж байна” гэсэн юм.
Харин түүний дараа УИХ-ын ажлын хэсгийг ахалж буй Д.Тэрбишдагва “Жил орчмын өмнө ажлын хэсэг байгуулагдаж 45 хоногийн дотор шалгах чиглэл ирсэн. Энэ хугацаанд шалгах ямар ч боломжгүй юм билээ. Эхний ээлжинд бид 45 хоногийн хугацаанд шаардлагатай материалуудыг цуглуулсан. Нийт 9 удаа хуралдсан. Оюу толгой төсөлд УИХ-ын гишүүд, эрдэмтэн судлаачид, намуудын төлөөлөл, яамны төрийн нарийн бичиг нарын дэд хэсэг гээд ажилласан. Бид өнгөрсөн хоёрдугаар сард ажлын хэсгийн дүгнэлтийг төрийн гурван өндөрлөг, ҮАБЗ-д өгсөн. Гарсан санал болон аудитын дүгнэлт АТГ зэргийг дүгнэж бодоод
12 гишүүний 8 нь гарын үсэг зурсан. Ажлын хэсгийн зургаан хүн намайг ажлаа хийж чадахгүй байна, өөрчилье гэж бичиг өгсөн юм байна лээ” гэв.
Р.Адъяасүрэн
